I. Erretaula egiteko teknika

5. Koloreak

5.1 Kolore gardenak

Kolore-geruza hauek pasatzen uzten diote argiari; halaz, argia beheko geruzetan islatzen da, eta distira eta sakontasun handiagoko kolore bat da emaitza. Horrela erabili diren koloreak laka berde, urdin, anbar eta gorria izan dira.

• Laka berde edo kobre-resinatoak (kobrearen azetato basikoa + erretxina), zilar gainean erabilita, berde metalizatu bat ematen du, baina kimikoki oso egonkortasun gutxikoa denez argiaren aurrean eta hainbat girotan, hondatu egin da, arre bihurtuz15.Laka urdinak (azurita), nahiz berez azurita ez den gardena, baina kantitate txikia eta kolaz oso disolbatuta erabiliz gero, zilar gainean eman, gure erretaulan bezala alegia, eta urdin metalizatua ematen du.
• Anbar-marroi kolorea, Erdi Aroko testuen arabera, hainbat koloratzaileetatik lortzen zuten (azafraia, dragoodola, landare-estraktuak eta substantzia ezagutezinak) eta proteina, olio, erretxin edo hauen nahasketa batekin aglutinatuta ateratzen zen, metalezko xaflaren gainean geruza bat edo gehiago emanda16. Gure kasuan, kolofonia motako erretxina diterpeniko bat eta argizaria da. Eta kolore hori, aukeran, argienetatik ilunetaraino joan daiteke, hots, horigorrixkatik hasi eta marroietaraino.
• Laka gorria, urre gainean azal handietan, ez zen oso ohikoa; batez ere tolesetan eta motibo gutxi batzuetan erabiltzen zen. Gure kasuan, aparteko kasu gisa aurkituko dugu San Rokeri laguntzen dion aingeruaren jantzietako apaingarri batean, gaur egun ia ezabatua.

Kolore gardenak. a) Gardendu berde eta gorria. Mendekostea. b) Gardendu gorria. Mendekostea. c) Gardendu urdina. Pilastra bateko zalditxoa.

Kolore gardenak. d) Gardendu anbarra. Balaamen txanoa. e) Gardendu berdea. San Roke. f) Gardendu anbarra. San Joanen tunika.