I. Erretaula egiteko teknika

2. Euskarria

2.1 Egitura

Erretaula intxaur, gaztaina, ezki eta haritz zurez eginda dago. Ezkia eta intxaur zurezko panelak txandakatu egiten dira friso fantastikoetan. Eskulturak eta erliebeak intxaur zurezkoak dira. Lehen estaiko kolomak eta pilastrak intxaurrezkoak dira, eta ezkizkoak berriz bigarren estaitik gora. Gaztaina lantzekeko zonetarako erabiltzen da, esaterako horma-konken barrenerako. Haritza horma-konken oinarrian eta sostengu egituran erabiltzen da.

• Intxaurrondoa: Juglandazeoen familiako zuhaitza, “juglans regia” izen zientifikoa duena, eta intxaurrondo europarra esaten zaio. Zurgiharra oso erresistentzia handikoa da xilofagoen aurrean, zurgizena, berriz, oso ahul gertatzen den bitartean. Konpresio eta flexioaren aurrean erresistentea da zur hau, eta zur nobletzat hartu izan da, erraz lantzeaz gain akabera bikaina lortzea ahalbidetzen du eta.
• Gaztainondoa: fagazeoen familiako zuhaitza, “castanea sativa mill.” izen zientifikoa duena, eta gaztainondo esaten zaiona. Zurak kolore hori argia du, zurgiharra eta zurgizena ez dira bereizten, eta hazkunde-eraztunak osooso markatuak ditu. Lehorrean oso ondo lantzen da. Heze-lehor aldaketen aurrean erresistentzia ona du.
• Ezkia: Tiliazeoen familiako zuhaitza, ezki esaten zaiona. Zura zuri-gorrixka edo horixka da, zurgizena eta zurgiharra ez dira bereizten, eta hazkunde-eraztunak ez dira askorik nabaritzen. Honen zura, pikor finekoa izaki, estimu handikoa da eskultura eta tailan.

Elkarri ertz biziz lotutako bi oholez konposatutako eszena: Miru-buztanezko sendogarriak pitzaduretan.

Elkarri ertz biziz lotutako bi oholez konposatutako eszena: Lotunea iztupaz estalia.

Ezkia aukeratu izanaren arrazoiak tailatzeko erraztasuna, zur biguna izatea eta besteak baino pisu txikiagokoa izatea dira. Eszenetan intxaurra erabiltzearen arrazoiak, berriz, zur honen sendotasuna eta enborren diametroa dira, hauetatik oso ohol zabalak atera baitaitezke, elkarri lotuz eszena zabalak egiteko aukeraz inolaz ere; eta honi erantsi behar, gainera, enborreko pieza bakar batetik ia-ia eskultura oso bat ateratzeko modua.